मंगळवेढा टाईम्स वृत्तसेवा । जिल्ह्यातील वाणिज्यिक व औद्योगिक वर्गवारीतील थकबाकीदार असलेल्या दोन हजार 893 ग्राहकांचा वीजपुरवठा खंडित करण्यात आला आहे. याशिवाय आठ हजार 24 थकबाकीदारांनी तीन कोटी 35 लाख रुपयांच्या वीजबिलाचा भरणा केला आहे.
महावितरणकडून सद्यःस्थितीत घरगुती, वाणिज्यिक व औद्योगिक वर्गवारीतील थकबाकीदारांचा वीजपुरवठा खंडित करण्याची मोहीम वेगात सुरू आहे. यामध्ये प्रामुख्याने मोठ्या रकमेचे थकबाकीदार असणाऱ्या वाणिज्यिक व औद्योगिक थकबाकीदारांविरुद्ध ही कारवाई अधिक तीव्र करण्यात आली आहे.
गेल्या महिन्याभरात जिल्ह्यातील अकलूज विभागात थकबाकीदार असलेल्या वाणिज्यिक व औद्योगिक 1112 ग्राहकांनी 36 लाख 5 हजार रुपयांचा भरणा केला. 23 लाख रुपयांच्या थकबाकीमुळे 481 ग्राहकांचा वीजपुरवठा खंडित केला आहे. बार्शी विभागात 2552 थकबाकीदारांनी 1 कोटी 10 लाख रुपयांचा भरणा केला. 50 लाख 92 रुपयांची थकबाकी असलेल्या 673 ग्राहकांची वीज खंडित केली. पंढरपूर विभागात 1331 थकबाकीदारांनी 47 लाख 9 हजार रुपयांचा भरणा केला. 22 लाख रुपयांच्या थकबाकीदार 414 ग्राहकांचा वीजपुरवठा खंडित केला आहे. सोलापूर शहर व ग्रामीण या दोन विभागात 3029 थकबाकीदारांनी 1 कोटी 40 लाख रुपयांचा भरणा केला आहे. 88 लाख 13 हजारांची थकबाकी असलेल्या 1325 ग्राहकांचा वीजपुरवठा खंडित केला आहे.
तात्पुरता किंवा कायमस्वरूपी वीजपुरवठा खंडित केल्यानंतरही थकबाकीदार अनधिकृतपणे विजेचा वापर करीत असेल तर त्यांच्याविरुद्ध थेट फौजदारी कारवाई करण्याच्या सूचना दिल्या आहेत. चालू व थकीत वीजबिलाचा भरणा करण्यासाठी अधिकृत वीजबिल भरणा केंद्र, ई-वॉलेटची सोय उपलब्ध आहे. चालू व थकीत वीजबिलाचा घरबसल्या भरणा करण्यासाठी www.mahadiscom.in ही वेबसाइट तसेच मोबाईल ऍपद्वारे “ऑनलाइन’ सोय उपलब्ध आहे. वीजपुरवठा खंडित करण्याची कारवाई टाळण्यासाठी थकीत रकमेचा भरणा करून सहकार्य करण्याचे आवाहन महावितरणने केले आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
