टीम मंगळवेढा टाईम्स।
मंगळवेढा तालुक्यात महावितरणकडून वीज बिल वसुली सुरू असताना वीज पुरवठ्याचा मात्र खेळखंडोबा झाला आहे. दिल्या जाणाऱ्या आठ तासांपैकी एक तास सुद्धा वीज योग्य व पुरेशा दाबाने मिळत नाही.
सध्या तालुक्याला उन्हाळी पिकांसाठी उजनीच्या कालव्यातून पाणी सोडले असताना विजेअभावी शेतकऱ्यांना पाणी घेता येत नाही. या पाण्याकडे केवळ पहात बसावे लागत असून पिके जळत असल्याने तातडीने विद्युत पुरवठा सुरळीत करण्याची मागणी होत आहे.
राज्यात वीज निर्माण करणाऱ्या केंद्रांना कोळशाची कमतरता भासू लागल्यामुळे विजेच्या भारनियमनात राज्यात वाढ होत आहे.
याचा फटका मंगळवेढा तालुक्याला देखील बसत असून मंगळवेढा तालुक्यातील ग्रामीण भागात रात्री व दिवसा विजेचे भारनियमन महावितरणच्या सोयीने सुरू आहे.
पाणी देखील विजेअभावी शेतकऱ्यांना आपल्या पिकांना देता येत नाही, त्यामुळे ती पिके जळू लागली आहेत. तसेच सध्या उजनीच्या उजव्या कालव्यातून उन्हाळी पिकांसाठी मंगळवेढा तालुक्यात पाणी सोडलेले आहे.
परंतु गेल्या तीन ते चार दिवसांपासून शेतकऱ्यांना शेतीसाठी आठ तास वीज देण्याचे धोरण असतानादेखील शेतकऱ्यांना केवळ एक ते दोन तास वीज मिळत आहे, तीदेखील अपुऱ्या व योग्य दाबाने मिळत आहे.
या दोन तासाच्या कालावधीत दहा ते वीस वेळा लाईन ट्रीप होत असते . त्यामुळे शेतकऱ्याच्या दंडात पाणी जाईपर्यंत वीज गुल होते.
ऊस, कडवळ, मका या पिकांना सध्या पाण्याची अत्यंत गरज असताना, विजेअभावी पाण्याचा शेतकऱ्यांना पिकासाठी उपयोग करता येत नाही.
महावितरणने शेतीसाठी असणारा किमान आठ तासाचा विद्युत पुरवठा सुरळीत करून द्यावा, अन्यथा महावितरणवर मोर्चा काढण्याचा इशारा येथील शेतकऱ्यांनी दिला आहे.
महावितरण कार्यालयावर मोर्चा काढणार
उजनीचे पाणी सध्या चालू असताना देखील खंडित विजेअभावी ते पाणी शेतकऱ्यांना वापरता येत नसल्याने महावितरणने शेतकऱ्यांना आठ तास वीज पुरवठा सुरळीत करून द्यावा,
अन्यथा महावितरणच्या कार्यालयावर शेतकऱ्यांचा मोर्चा काढणार असून महावितरणने त्वरित दखल घ्यावी.- सिद्धेश्वर आवताडे, चेअरमन, खरेदी विक्री संघ, मंगळवेढा
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
