पोटनिवडणुकीमुळे सोलापूर जिल्ह्यात दोन दिवस संचारबंदी शिथिल; ‘हा’ आदेश मात्र कायम राहणार

टीम मंगळवेढा टाईम्स ।

पंढरपूर-मंगळवेढा विधानसभा पोटनिवडणुकीसाठी १७ एप्रिल रोजी मतदान आहे. मतदान करण्यासाठी मतदारांना जाणे- येणे सुलभ व्हावे , यासाठी १६ एप्रिलच्या सकाळी सात वाजल्यापासून ते १८ एप्रिलच्या सकाळी आठ वाजेपर्यंत सोलापूर जिल्ह्यात संचारबंदी शिथील करण्यात आल्याची माहिती जिल्हाधिकारी मिलिंद शंभरकर यांनी दिली

कोरोनाचा वाढता प्रादुर्भाव रोखण्यासाठी राज्य सरकारच्याने 15 एप्रिल ते 1 मे दरम्यान कडक संचारबंदी लागू केली आहे. नव्या निर्बंधानूसार जिल्हाधिकारी मिलिंद शंभरकर व महापालिका आयुक्त पी. शिवशंकर यांनी काल रात्री उशिरा आदेश काढले आहेत.

होम डिलेव्हरी व पार्सल सेवेला काही प्रमाणात सूट दिली आहे. महापालिका हद्दीतील बार, रेस्टॉरंट आणि हॉटेल्सला रात्री दहापर्यंत होम डिलेव्हरी आणि पार्सल सेवेच्या अनुषंगाने परवानगी दिली आहे.

ऑर्डर देण्याच्या उद्देशाने किंवा ऑर्डर घेऊन जाण्याच्या उद्देशाने कोणीही भेट देऊ नये, असे आदेशातून स्पष्ट केले आहे. तर रूग्णांची सेवा करणाऱ्यांना सवलत देण्यात आली आहे.

कारखाने/उद्योगातील एखादा कर्मचारी कोरोना बाधित आढळल्यास त्यांच्या संपर्कातील सर्व कामगारांचे अलगीकरण कारखाना प्रशासनाला स्वखर्चाने करावे लागणार आहे.

पाचशेपेक्षा जास्त कामगार असलेल्या कारखाना किंवा उद्योगाच्या ठिकाणी स्वतःचेअलगीकरण केंद्र स्थापन करावे लागणार आहे. एखादा कामगार कोरोनाबाधित आल्यास हा कारखाना/युनिट पूर्ण निर्जंतुक होईपर्यंत बंद ठेवले जाणार आहे.

सर्व हॉटेल, रेस्टॉरंट आणि बार हे एकत्रित बसून सेवा देण्यासाठी बंद करण्यात आले आहेत. होम डिलिव्हरी करणाऱ्या सर्व कर्मचाऱ्यांचे लवकरात लवकर लसीकरण करण्याची सूचनाही या आदेशात करण्यात आली आहे.

सार्वजनिक वाहतुकीसाठी ऑटो रिक्षामध्ये ड्रायव्हर व दोन प्रवासी, टॅक्‍सी/चार चाकी वाहनांमध्ये ड्रायव्हर व वाहनाच्या 50 टक्के क्षमतेने प्रवासी वाहतूक, बस वाहतुकीसाठी आरटीओने दिलेल्या पासिंगनूसार पूर्ण क्षमतेने वाहतुकीस परवानगी दिली आहे.

चारचाकी/टॅक्‍सी वाहनांत जर कोणत्याही एका व्यक्तीने मास्क घातला नसेल तर त्या टॅक्‍सी चालकाला व मास्क न घालणारे व्यक्तीला प्रत्येकी पाचशे रुपये दंड आकारला जाणार आहे. रस्त्याच्या कडेच्या खाद्य विक्रेत्यांनी रस्त्याच्या ठिकाणी ग्राहकांना खाद्यपदार्थ खाण्यास देऊ नये.

ग्रामीण भागासाठी फक्त पार्सल सेवा व घरपोच सेवा सकाळी सात ते रात्री आठ या वेळेत तर महापालिका हद्दीत सकाळी 7 ते सायंकाळी 6 यावेळेत सर्व दिवशी देता येणार आहे.

या कालावधीत सिनेमा हॉल, नाट्यग्रह, सभाग्रह, मनोरंजन पार्क, व्हिडिओ गेम पार्लर, वॉटर पार्क, क्‍लब, जलतरण तलाव, व्यायामशाळा, क्रीडा संकुले, चित्रपट/सिरियल/जाहिरातीचे चित्रीकरण पूर्णपणे बंद राहणार आहे.

धार्मिक स्थळांमध्ये दैनंदिन नित्य उपचार सुरु राहतील परंतु बाहेरील व्यक्तींना मनाई असणार आहे. शाळा व महाविद्यालय बंद राहणार असून दहावी व बारावीच्या विद्यार्थ्यांना परीक्षेसाठी ही अट शिथिल करण्यात आली आहे. केश कर्तनालय, स्पा, सलून व ब्युटी पार्लर ही दुकाने बंद राहणार आहेत.

पोटनिवडणुकीसाठी आज संचारबंदी शिथिल
पंढरपूरच्या पोटनिवडणुकीसाठी बंदिस्त ठिकाणी दोनशे व्यक्तींना अथवा सदर जागेचा 50 टक्के क्षमतेपर्यंत जी संख्या कमी असेल इतक्‍या व्यक्तींच्या उपस्थितीत सभा घेण्यास परवानगी देण्यात आली आहे.

सभा व मेळाव्याच्या ठिकाणी स्वतंत्र अधिकारी/कर्मचारी नियुक्त केला जाणार आहे. या मतदार संघा निवडणुकीच्या कामासाठी व प्रचारासाठी संचारबंदी शिथील करण्यात आली आहे.

विवाहासाठी 25 तर अंत्यविधीसाठी 20 जण
विवाह स्थळ, मंगल कार्यालय इत्यादी ठिकाणी सर्व कर्मचाऱ्यांचे अभ्यंगतांचे लसीकरण अथवा कोरोना निगेटिव्ह रिपोर्ट आवश्‍यक आहे. लसीकरण अथवा कोरोना निगेटीव्हचे प्रमाणपत्र नसल्यास अशा व्यक्तीला एक हजार रुपये दंड केला जाणार आहे.

विवाहस्थळ अस्थापनांना दहा हजार रुपयांचा दंड केला जाणार आहे. लग्नासाठी जास्तीत जास्त 25 जणांना तर अंत्यविधीसाठी जास्तीत जास्त वीस व्यक्तींना परवानगी देण्यात आली आहे.

बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.

बातम्या सर्वप्रथम जाणून घेण्याकरिता लाईक करा आमचे फेसबुक पेज