टीम मंगळवेढा टाईम्स।
जालना येथील मराठा समाजाच्या आंदोलकांवर झालेल्या लाठीचार्ज नंतर राज्यातील वातावरण तापले आहे. राष्ट्रवादीचे नेते शरद पवार, शिवसेना पक्षप्रमुख उद्धव ठाकरे, छत्रपती संभाजी, खासदार उदयनराजे भोसले आदि नेत्यांनी आंदोलनस्थळी जाऊन आंदोलकांची भेट घेतली.
नेते आले आणि आश्वासन देऊन गेले. पण, आंदोलक आपल्या मागण्यांवर ठाम आहेत. आंदोलनाचा भडका सलग दुसऱ्या दिवशीही कायम होता. मराठा समाजाच्या आंदोलकांवर झालेल्या लाठीमाराचे तीव्र पडसाद मुंबईसह अन्य जिल्ह्यातही उमटले आहेत.
मुंबईमध्ये दादर येथील प्लाझा सिनेमाबाहेर मराठा मोर्चाचे आंदोलन झाले. यावेळी इमर्जन्सी रिस्पॉन्स टीम, दंगल नियंत्रण पथक तैनात करण्यात आले होते.
मुख्यमंत्री शासन आपल्या दारी कार्यक्रम करतात कायदा हातात घेऊ नका म्हणतात. मुख्यमंत्री एकनाथ शिंदे मराठा समाजाचे, उपमुख्यमंत्री अजित दादा पवार हे देखील मराठा समाजाचे. मात्र, मराठा समाजाला न्याय मिळत नाही. आरक्षण मिळत नाही, अशी टीका आंदोलकांनी केली.
सोलापूरच्या माढा येथे मराठा समाजाने आज रास्ता रोको आंदोलन केले. यावेळी आंदोलकांनी घोषणाबाजी करुन गृहमंत्री देवेंद्र फडणवीस यांच्या राजीनाम्याची मागणी केली. तर, मराठा समाजातील लहान शालेय मुलांच्या हस्ते तहसीलदारांना निवेदन देण्यात आले.
हिंगोली जिल्ह्यातील कळमनुरी तालुक्यातील आखाडा बाळापूर परिसरात नांदेड हिंगोली महामार्गावर आज रास्ता रोको आंदोलन करण्यात आले. ‘एक मराठा, लाख मराठा’ अशा घोषणा आंदोलकांनी दिल्या. यामुळे महामार्गावर दोन्ही बाजूंनी वाहनांच्या मोठ्या रांगा लागल्या होत्या. या दरम्यान आंदोलकांनी एका ॲम्बुलन्सला वाट मोकळी करून देत माणुसकीचे दर्शन घडविले.
मंगळवेढा व पंढरपूरमध्ये कडकडीत बंद पाळण्यात आला. शहरातील सर्व मुख्य रस्ते, बाजारपेठ बंद होत्या. रविवार असल्यामुळे दर्शनासाठी भाविकांची मोठी गर्दी झाली. पण, बंदमुळे त्यांची तारांबळ उडाली.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
