टीम मंगळवेढा टाईम्स।
मंगळवेढा येथील संत दामाजी पुतळ्याचा कापडी छत फाटून गेला असून, कुणी छत देता का छत असे म्हणण्याची वेळ दामाजी पंतांच्या भाविक भक्तांवर आली आहे. पुतळा सुशोभिकरण करण्यात यावे अशी मागणी नागरिकांतून होत आहे.
विठ्ठल भक्त दामाजीपंतांनी बिदर बादशहाच्या राजवटीत नोकरीत असताना या भागात पडलेल्या भयानक दुष्काळात बादशाहकडून होणाऱ्या कोणत्याही शिक्षेची तमा न बाळगता येथील जनता उपाशी मरू नये, यासाठी सरकारी धान्याची कोठारे खुली करून येथील जनतेचे अन्नावाचून होणारे हाल थांबवले होते.
त्यांच्या या सामाजिक कार्याची प्रेरणा, आदर्श मिळावा, त्यांचे विचार भावी पिढीला प्रेरक बनावे, यासाठी तत्कालीन काही समाज धुरीणांनी येथील दामाजी चौकात संत दामाजीपंत यांचा हात जोडून उभा असलेला पुतळा उभा केला आहे.
या पुतळ्याची देखभाल गेल्या अनेक दिवसांपासून नगरपालिकेकडून होत आहे. गेल्या काही दिवसापूर्वी दामाजीपंतांच्या पुतळ्यावरील पत्र्याचे छत खराब झाल्याने ते काढून टाकण्यात येवून, कापडी मंडप मारण्यात आला.
ऊन व पावसामुळे सद्या हा कापडी मंडप फाटला असून तो वाऱ्यावर उडत आहे. विकास कामांसाठी कोट्यवधी निधी खर्च होत असताना दामाजीपंतांच्या पुतळ्याचे शुशोभिकरण करण्यात यावे अशी मागणी होत आहे.
दामाजी चौकातील संत दामाजी पंतांच्या चबुतऱ्याच्या सुशोभीकरणाच्या कामासाठी ठेकेदारास नोव्हेंबर २०२० मध्ये वर्क ऑर्डर दिली आहे . त्यांनी अद्याप काम चालू केलेले नाही . याबाबत संबंधित विभागाशी चर्चा करून काम लवकर होण्याच्या दृष्टीने प्रयत्न करू असे आश्वासन नगराध्यक्षा अरुणा माळी यांनी दिले.
संत दामाजीपंत पुतळयाचे सुशोभीकरणाचे काम आठ दिवसात सुरु करावे ..अन्यथा लोकवर्गणीतून , स्वखर्चाने करण्यास परवानगी मिळावी : सिध्देश्वर आवताडे
दामाजी चौकातील श्री संत दामाजीपंताच्या पुतळयाचे सुशोभीकरणाचे आठ दिवसात चालू करावे अन्यथा आम्हाला लोकवर्गणीतून , स्वखर्चाने करण्यास परवानगी मिळावी अशा आशयाचे निवेदन मंगळवेढा तालुका सहकारी खरेदी विक्री संघाचे चेअरमन सिध्देश्वर आवताडे यांनी मुख्याधिकाऱ्यांना दिले.
श्री दामाजीपंत हे मंगळवेढयाचे भूषण असून त्या थोर संताच्या वास्तव्यामुळे व त्यांनी मंगळवेढा परिसरासाठी बिदर बादशहाच्या राजवटीत कोणत्याही परिणामाची पर्वा न करता या भागातील दुष्काळी जनतेला सरकारी धान्याची गोदामे खुली करून जनतेला मदतीचा हात दिला होता.
त्यांच्या कार्याची दखल खुद्द विठुरायाला घ्यावी लागल्याची अख्यायिका आहे. दामाजीपंताच्या थोर कार्यामुळे त्यांना संतपद प्राप्त झाले. त्यामुळे येथील भाविकांनी त्यांचे मंदिर तसेच पुतळा उभा करून त्यांचे कार्याची दखल घेतली आहे.
त्यांची विठ्ठल भक्ती थोर असून पंढरपूर येथे येणारे भाविक भक्त मंगळवेढा येथे दामाजीपंतांच्या दर्शनासाठी येत असतात. वारकरी बांधवांमध्ये दामाजीपंतांचे स्थान अढळ असून मंगळवेढयाची अस्मिता म्हणून दामाजीपंत यांच्याकडे पाहिले जाते.
दर्शनासाठी येणाऱ्या भाविकांमुळे येथे पर्यटन व्यवसायदेखील वाढू लागला असून दामाजीपंताची महती देश विदेशात गेली असल्याने मंगळवेढयाला संतभूमी म्हणून ओळखले जात आहे . परंतू गेल्या काही दिवसापासून दामाजी चौकातील संत दामाजी पुतळा सुशोभीकरण करण्याकडे नगरपालिकेचे दुर्लक्ष होत आहे.
त्यामुळे वारकरी व भाविक भक्तांमधून तीव्र नाराजी व्यक्त होत आहे . नगरपालिका प्रशासनाकडून या सुशोभीकरणाचे काम दिलेल्या ठेकेदाराकडून वेळेवर केले जात नाही .
थोर संतांच्या पुतळयाची दुरावस्था आम्हा भाविकांना व मंगळवेढेकरांना पाहवत नसल्याने आम्ही नगरपरिषदेकडे अगोदरदेखील स्वखर्चाने अथवा लोकवर्गणीतून सुशोभीकरणाच्या कामासाठी परवानगी मागीतली होती . परंतू याची दखल घेतली गेली नाही .
आणि नगरपालिकेनेही काम केले नाही . त्यामुळे येत्या आठ दिवसात सुशोभीकरणाचे काम नगरपालिकेने सुरु करावे अन्यथा आम्हाला स्वखर्चाने अथवा लोकवर्गणीतून ते काम करण्यास परवानगी दयावी असे त्या निवेदनामध्ये सिध्देश्वर आवताडे यांनी म्हटले आहे .
यावेळी माजी नगराध्यक्ष अशोक माळी , पोपट पडवळे , नितीन मोरे , संजय नागणे , ज्ञानेश्वर कोंडुभैरी , संभाजी घुले , संजय जगताप , अर्जुन ओमने , विरेंद्र राक्षे आदी उपस्थित होते.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
