मंगळवेढा टाईम्स न्युज नेटवर्क ।
मूळ मालकाला खबर न लागू देता बनावट दस्त तयार करून जागेच्या मूळ मालकानेच आसरा चौक परिसरातील प्लॉट विक्रीला दिल्याचा बनाव केला.
सन २००४ ते २०२० या दरम्यान ही घटना घडली आहे. याप्रकरणी साक्षीदारासह तिघांविरुद्ध सदर बझार पोलिस ठाण्यात गुन्हा नोंदला आहे.
पोलिस सूत्रांनुसार, फिर्यादी सज्जन विनायक कांबळे (वय ४९, रा. बुधवार पेठ, जय मल्हार चौक) यांनी किशोर चंडक यांच्याकडून ५ मार्च २००२ रोजी मंत्री चंडक इस्टेटमधील प्लॉट नंबर ११७ रीतसर खरेदी केला होता.
त्यानंतर हा प्लॉट यातील फिर्यादी यांनी कोणासही विक्री केला नाही. परंतु, फिर्यादी यांनी खरेदी केल्याच्या १६ वर्षांनंतर प्लॉटच्या फेर उताऱ्यावर संशयित व्यक्तीच्या नावाची नोंद करण्यात आली. त्यासाठी अनोंदणीकृत बनावट कागदपत्रे आरोपींकडून तयार करण्यात आली.
दरम्यान, आरोपी इस्माईल याने बनावट कागदपत्रांचा वापर करून बेकायदेशीर व्यवहार करून यातील फिर्यादी सज्जन व शासनाची फसवणूक केली आहे.
या व्यवहारास चंद्रकांत सिद्राम कांबळे व अब्बास अ. हमीद शेख हे साक्षीदार म्हणून उपस्थित होते. त्यांच्याविरुद्धही गुन्हा दाखल करण्यात आला असून, पोलिस निरीक्षक क्षीरसागर तपास करीत आहेत.
अशीही बनवाबनवी
विशेष म्हणजे २००४ मध्ये यातील फिर्यादी सज्जन कांबळे यानेच आरोपी इस्माईल इब्राहिम शेख (रा. इंदिरा नगर, विजापूर रोड) यास खरेदी दिल्याचे या कागदपत्रात दाखविण्यात आले.
या बनावट कागदपत्रांच्या आधारे आरोपी इस्माईल याने उताऱ्यावर स्वतःच्या नावाची नोंद करून घेऊन जहीर मुल्ला या व्यक्तीला तो प्लॉट विक्री केला. त्यानंतर जहीर मुल्ला यानेही महमद युसूफ याकुब अली उस्ताद यांना तो प्लॉट खरेदी दिला, असे फिर्यादीत म्हटले आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
