टीम मंगळवेढा टाईम्स ।
मंगळवेढा तालुक्यातील काही ग्रामपंचायतीमध्ये जागतिक दिव्यांग दिन साजरा न करणाऱ्या; तसेच दिव्यांग निधी वाटप न करणाऱ्या ग्रामसेवकावर तात्काळ कारवाई करावी, यासाठी गटविकास अधिकाऱ्यांच्या केबिनमध्ये रिकाम्या खुर्चीसमोर प्रहारच्या पदाधिकाऱ्यांनी बोंब मारत आंदोलन केले.
दरम्यान, प्रहारकडून पंचायत समिती आवारात आंदोलन होणार असल्याची कुणकुण लागताच तेथे उपस्थित असणारे गट विकास अधिकारी शिवाजी पाटील यांनी पळ काढल्याने,
आवारात आंदोलन करण्यासाठी आलेल्या प्रहारच्या आंदोलकांनी संतप्त झाल्याने त्यांच्या केबिनमध्ये बोंबलत बसल्यामुळे पंचायत समितीच्या सर्व कर्मचाऱ्यांची पळापळ झाली.
मंगळवेढा तालुक्यातील सर्व ग्रामपंचायतीमध्ये दिव्यांग दिन साजरा करावा, यासाठी प्रहारने गटविकास अधिकारी पाटील यांच्याकडे निवेदनाद्वारे मागणी केली होती.
परंतु, तरीही डोंगरगावसह काही ग्रामपंचायतीने जागतिक दिव्यांग दिन साजरा केला नाही, तसेच दिव्यांग निधीचेही वाटप केले नाही. त्यामुळे संबंधित ग्रामपंचायतीच्या ग्रामसेवकावर तात्काळ कारवाई करावी, अशी ठाम मागणी करत शुक्रवारी दुपारी दीड वाजता प्रहारचे पदाधिकारी पंचायत समिती आवारात आंदोलनासाठी आले होते.
परंतु आंदोलनाच्या अगोदर कार्यालयात उपस्थित असणारे गटविकास अधिकारी पाटील हे आंदोलनाच्या धसक्याने अगोदरच गायब झाले होते.
प्रहार जनशक्ती पक्षाचे जिल्हा सरचिटणीस श्रीपाद पाटील, जिल्हा उपाध्यक्ष सिदराया माळी, प्रहारचे मंगळवेढा तालुकाध्यक्ष समाधान हेंबाडे, प्रहार जनशक्ती पक्षाचे तालुका उपाध्यक्ष राकेश पाटील,
खडकी ग्रामपंचायत सदस्य व तालुका उपाध्यक्ष रोहिदास कांबळे, तालुका संपर्क प्रमुख शकील खाटिक, शालन काळे, अर्जुन गायकवाड, पांडुरंग हेंबाडे आदी उपस्थित होते.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
