टीम मंगळवेढा टाईम्स ।
प्राथमिक शिक्षण विभागातील एक गटशिक्षणाधिकारी वाईट हेतू ठेवून आपल्याशी लगट करण्याचा प्रयत्न करत आहे. यासंदर्भात तत्कालीन शिक्षणाधिकारी , विद्यमान मुख्य कार्यकारी अधिकारी यांच्यासह मुख्यमंत्री, उपमुख्यमंत्र्यांना आपण पत्रे पाठविली.
मात्र याबाबत संबंधितावर कोणतीही कारवाई करण्यात आली नाही. त्यामुळे आता संबंधित अधिकाऱ्यावर तात्काळ कठोर कारवाई करावी, अन्यथा पालकमंत्री राधाकृष्ण विखे-पाटील यांच्या गाडीसमोर आत्मदहन करण्याचा इशारा संबंधित शिक्षिकेने निनावी पत्राद्वारे दिला आहे. या निनावी बॉम्बमुळे जिल्हा परिषद वर्तुळात एकच खळबळ उडाली आहे.
अगोदरच सोलापूर जिल्हा परिषद प्राथमिक शिक्षण विभाग विविध प्रकरणाने राज्यभर गाजत असताना त्यात या नव्या गंभीर प्रकरणाची भर पडली आहे.
या प्रकरणाची सखोल चौकशी होऊन या प्रकाराची शहानिशा होण्याची गरज आहे मात्र या प्रकरणाकडे जिल्हा परिषद प्रशासन किती गांभीर्याने पाहणार , हा संशोधनाचा विषय आहे.
हा प्रकार मागील सात ते आठ महिन्यांपासून सुरू आहे. यासंदर्भात तत्कालीन शिक्षणाधिकारी, विद्यमान मुख्य कार्यकारी अधिकारी यांच्याकडे आपण तक्रार केली.
मात्र संबंधित अधिकाऱ्यावर कोणतीही कारवाई होत नसल्याने त्याचे धाडस वाढले आहे. दिवाळीच्या दरम्यान तर आमच्या घरी कोणी नाही. तुम्ही फराळाला या म्हणेपर्यंत त्या गटशिक्षणाधिकाऱ्याची मजल गेल्याचे त्या निनावी पत्रात नमूद करण्यात आले आहे.
विशेष म्हणजे प्रशासनातील अधिकाऱ्यांकडे न्याय मागूनही मिळत नसल्याने संबंधित शिक्षिकेने जिल्हा परिषदेचे माजी अध्यक्ष बळीराम साठे यांनाही पोस्टाद्वारे पत्र पाठवित आपल्याला न्याय द्यावा, अशी मागणी केली आहे. केवळ त्यामुळे या प्रकरणाचे बिंग फुटले आहे.(स्रोत:पुण्यनगरी)
अशा अधिकाऱ्यांना जाहीरपणे जोड्याने मारा- साठे
एका महिला शिक्षिकेने आपल्यावर होणाऱ्या अन्यायासंदर्भात निनावी पत्र पाठवून सविस्तर कथन केले आहे. शिक्षण क्षेत्रासारख्या पवित्र ठिकाणी असे उद्योग करणाऱ्या अधिकाऱ्याची चौकशी करून कारवाई करण्याची मागणी आपण मुख्य कार्यकारी अधिकारी स्वामी यांची भेट घेऊन केली आहे. हा प्रकार सत्य असेल तर अशा अधिकाऱ्याला जाहीरपणे जोड्याने मारले पाहिजे, असा संताप बळीराम साठे यांनी व्यक्त केला आहे.
या प्रकरणी कठोर कारवाई – स्वामी
निनावी पत्राद्वारे कथन करण्यात आलेला हा प्रकार अतिशय गंभीर आहे. या संदर्भात त्या महिला शिक्षिकेचे म्हणणे इन कॅमेरा घेऊन तक्रारदाराचे नाव गुप्त ठेवण्यात येणार आहे.
संपूर्ण प्रकाराची सखोल चौकशी करून दोषी असणाऱ्यांवर प्रशासकीय कारवाईबरोबरच पोलीस कारवाई करण्यात येणार असल्याचे मुख्य कार्यकारी अधिकारी दिलीप स्वामी यांनी सांगितले.
जाणीवपूर्वक बदनाम करण्याचा प्रकार : जमादार
मध्यंतरी एका वरिष्ठ अधिकाऱ्यासंदर्भात अपशब्द वापरल्याप्रकरणे संघटनेच्या माध्यमातून आपण काम बंद आंदोलन केले होते. त्याचा रोष धरूनच हा प्रकार केला जात आहे. यात अनेक माहिती अधिकारी कार्यकर्त्यांचा समावेश आहे.
यासंदर्भात आपण दि.१७ ऑक्टोबर रोजी मुख्य कार्यकारी अधिकारी यांना पत्र लिहून घडत असलेल्या संभाव्य अर्थहीन प्रकाराबद्दल माहिती दिली असल्याचे गटशिक्षणाधिकारी बापूसाहेब जमादार यांनी सांगितले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
