टीम मंगळवेढा टाईम्स।
जनावरे घेऊन भरधाव वेगाने निघालेला टेम्पो उलटून झालेल्या अपघातात सात म्हशी जागीच ठार झाल्याची घटना बेगमपूर गावाजवळ आज पहाटे एक ते दोन वाजण्याच्या सुमारास घडली.
टेम्पोतून खाली पडलेल्या अन्य बारा म्हशी मात्र बचावल्या. या अपघातात मृत जनावरे व टेम्पो असे सुमारे पाच लाखाहुन अधिक नुकसान झाले.
रविवारी पहाटे मंगळवेढ्याकडून एमएच १३ एएक्स २२३६ हा टेम्पो सोलापूरच्या दिशेने सुमारे १९ म्हशी घेवून भरधाव वेगाने निघाला होता.
दरम्यान चालकाकडून अतिवेग व अनियंत्रितपणे टेम्पो चालविला गेल्याने चालकाचा टेम्पोवरील ताबा सुटला. त्यामुळे बेगमपूर (ता. मोहोळ) जवळील यादव यांच्या शेताजवळील नेचर दूध डेअरीसमोर टेम्पो उलटला.
टेम्पोतील जनावरे रस्सीने जोरदार बांधलेली होती. त्यामुळे त्यांना बाहेर पडणे शक्य न झाल्याने रस्सीचा फास गळ्याला आवळला गेल्याने सहा जनावरे जागीच गतप्राण झाली.
यावेळी अपघाताच्या आवाजाने परिसरातील नागरिकांनी व माहिती मिळताच कामती पोलिस ठाण्याचे हेड कॉन्स्टेबल नागनाथ कुंभार, पोलिस अंमलदार बबलू नायकवडी, अनुप दळवी, अंमलदार राहुल दोरकर आदी कर्मचाऱ्यांनी घटनास्थळी धाव घेतली.
परिस्थितीचे गांभीर्य ओळखत म्हशींच्या गळ्याला बांधलेल्या दोऱ्या कापून काढल्या. त्यामुळे अन्य बारा म्हशीचे प्राण वाचले.
गळ्यातील दोऱ्या मोकळ्या झाल्याने म्हशींनी पळ काढला. परंतु, कामती पोलिसांनी स्थानिक नागरिकांच्या मदतीने पळून गेलेल्या म्हशींना तात्काळ पकडून ताब्यात घेतले.
या घटनेत टेम्पोचे सुमारे एक लाखाहून अधिक नुकसान व मृत जनावरे चार लाखाहून अधिक किमतीचे नुकसान झाले असल्याचे पोलिसांनी सांगितले.
कामती पोलिस ठाण्याचे सहाय्यक पोलिस निरीक्षक अंकुश माने यांच्या मार्गदर्शनाखाली मृत जनावरांवर गावाजवळील वनीकरण विभागाच्या परिसरात अंत्यसंस्कार करण्यात आले. तर ताब्यात घेतलेल्या अन्य बारा म्हशींना कारंबा (ता. उत्तर सोलापूर) येथील गोशाळेत पाठविले.(स्रोत:सकाळ)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
