टीम मंगळवेढा टाईम्स।
कार्तिकी यात्रेच्या पार्श्वभूमीवर पंढरपुरात महाराष्ट्रातून येणाऱ्या भाविकांची मांदियाळी जमली आहे. पांडुरंगाच्या दर्शनासाठी येणारा भाविक घरी जाताना पेढ्यासह प्रसाद घरी घेऊन जातो.
मात्र या पेढ्यामध्ये विक्रेत्यांनी स्टार्च अन्नपदार्थाची भेसळ केल्याचे अन्न व औषध प्रशासनाने केलेल्या कारवाईत आढळले.
काल गुरुवारी ३ नोव्हेंबर रोजी दिवसभरात झालेल्या कारवाईत दहा जण सापडले. त्यांच्याविरुद्ध पंढरपूर पोलीस ठाण्यात गुन्हा नोंदला आहे.
कार्तिकी यात्रेच्या निमित्ताने येणाऱ्या भाविकांना सकस प्रसाद मिळावा. भेसळीवर चाप लावण्यासाठी अन्न व औषध प्रशासनाकडून गुरुवारी दिवसभर धडक तपासणी मोहीम राबविण्यात आली.
या पथकाचे अन्नसुरक्षा अधिकारी प्रशांत कुचेकर, उमेश भुसे व नमुना सहायक श्रीशैल हिटनळ्ळी यांना काळा मारुती चौक येथे भेसळ असलेला पेढा विक्री होत असल्याची खबर मिळाली.
पथकाने तेथे जाऊन पाहणी केली असता हिम्मत गणू चौगुले व बाबू दादा माने (दोघे रा कवठेमहांकाळ, जि.सांगली) फरार झालेले अन्य आठ जणांनी आणलेल्या पेढ्यात भेसळ असल्याचा संशय आला.
स्टार्च या अन्न पदार्थाची भेसळ
या पेढ्यात जागेवर आयोडिन टाकून पाहिले असता, त्यात स्टार्च या अन्न पदार्थाची भेसळ असल्याचे आढळून आले.
सदरची कारवाई सहायक आयुक्त ( अन्न ) प्रदीपकुमार राऊत यांच्या मार्गदर्शनाखाली अन्नसुरक्षा अधिकारी प्रशांत कुचेकर, उमेश भुसे व नमुना सहायक श्रीशैल हिटनळ्ळी यांच्या पथकाने पूर्ण केली .(स्रोत;लोकमत)
७२ हजार रुपयांचा भेसळ पेढा कचऱ्यात
दहा विक्रेत्यांकडे एकूण ३०० किलो भेसळयुक्त पेढा आढळला. त्याचे बाजारमूल्य ७२ हजार रुपये होती. हा साठा जप्त करून तो जागेवरच नष्ट करण्यात आला आणि नगर परिषदेच्या कचरा गाडीत त्याची विल्हेवाट लावली.
या प्रकरणी भादंवि २७२ , ३४ नुसार एकूण १० आरोपीविरुद्ध पंढरपूर शहर पोलीस ठाण्यात उशिरापर्यंत गुन्हा दाखल करण्याची प्रक्रिया सुरु होती. अन्न व औषध प्रशासनाच्या वतीने सर्व स्वच्छ, निर्भेळ अन्नपदार्थ विक्रीस ठेवावेत, असे आवाहन करण्यात आले आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
