टीम मंगळवेढा टाईम्स ।
पंढरपूर, सांगोला, मंगळवेढा, माढा या चार तालुक्यांसाठी मी पोस्ट विभागातील प्रमुख व क्लासवन अधिकारी आहे. तुम्ही पैसे दिले तर तुमच्या मुलांना पोस्टामध्ये पोस्टल असिस्टंट म्हणून नोकरीला लावतो म्हणून
एकाने पंढरपुरातील सातजणांकडून २३ लाख ५० हजार रुपये घेतल्याचा प्रकार शनिवारी उघडकीस आला.
याप्रकरणी सचिन देविदास शिनगारे (रा.मांजरी,ता.सांगोला) याच्यावर विरुद्ध शहर पोलीस ठाण्यात गुन्हा दाखल करण्यात आला असल्याची माहिती सपोनि. सी . व्ही . केंद्रे यांनी दिली.
पोलीस सुत्रांकडून मिळालेल्या माहितीनुसार, हर्बल प्रोडक्ट घेण्याच्या निमित्ताने पंढरपूर येथील पंढरपुरातील गाताडे प्लॉट येथे राहणाऱ्या प्रतीक्षा राजेंद्र मोरे आणि सचिन शिनगारे यांची ओळख झाली.
यावेळी मोरे यांनी गेल्या वर्षी पोस्टात नोकरीसाठी अर्ज केला होता, ही माहिती शिनगारे याला सांगितली. त्याने पोस्टात आपल्या वरिष्ठ अधिकाऱ्यांशी ओळखी आहेत.
काही पैसे दिल्यास मी तुमच्या मुलीला नोकरी मिळवून देऊ शकतो, असे त्याने राजेंद्र मोरे यांना सांगितले.
यानंतर प्रतीक्षा राजेंद्र मोरे आणि त्यांच्या सुनेला पोस्टात नोकरी मिळवून देतो म्हणून राजेंद्र मोरे यांच्याकडून ४ लाख रुपये घेतले.
तसेच संजय बाळासाहेब मोरे (रा.गाताडे प्लॉट, पंढरपूर) यांच्याकडेही मुलाला नोकरीसाठी २ लाख रुपये, आबासाहेब बाळासाहेब मोरे यांच्या मुलीला नोकरीसाठी ३ लाख रुपये,
रतिलाल पवार यांच्या दोन मुलांसाठी ६ लाख रुपये, विठ्ठल भगवान धोत्रे यांच्या मुलासाठी ३ लाख रुपये, अनिकेत अनिल बनकर यांच्याकडून १ लाख ५० हजार रुपये,
अर्जुन कृष्णा शेजवाळ यांच्या मुलाला नोकरी लावतो म्हणून त्यांच्याकडून ४ लाख रुपये घेतले.
अशा एकूण सात लोकांचा विश्वास संपादन करून त्यांच्याकडून २३ लाख रुपये घेऊन त्यांची फसवणूक केली आहे.(स्रोत:लोकमत)
बनावट ओळखपत्राचे वाटप
प्रतीक्षा मोरे व तिचे वडील राजेंद्र मोरे यांनी पोस्ट कार्यालयातून नोकरी लागल्याचा पुरावा द्या म्हणाल्यावर सचिन शिनगारे याने पोस्टाचा लोगो वापरून एक बनावट ओळखपत्र तयार केले.
एक बनावट ई मेल आयडी तयार करून त्यावरून मोरे यांना एक मेल पाठवला. त्याद्वारे नकली अर्ज क्रमांक, केंद्र याची खोटी माहिती दिली. पोस्ट खात्याकडूनच हा मेल आल्याचे मोरे यांना भासवले.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
