टीम मंगळवेढा टाईम्स ।
गोवा येथे येत्या फेब्रुवारीत विधानसभेची निवडणूक होणार आहे.ती जाहीर होण्यास अद्याप वेळ आहे.
मात्र भाजपने अगोदरपासून या निवडणुकीची तयारी केली आहे. त्यासाठी महाराष्ट्राचे माजी मुख्यमंत्री व विधानसभेतील विरोधी पक्षनेते देवेंद्र फडणवीस यांची प्रभारी यापूर्वीच नेमणूक करण्यात आली आहे.
त्यांच्या मदतीला त्यांच्या टीममध्ये आता माजी मंत्री व मावळचे माजी आमदार बाळा भेगडे यांना घेण्यात आले. त्यांनी पंढरपूर-मंगळवेढा पोटनिवडणुकीतील आपल्या अनुभवाचा वापर करुन गोव्यातही विजय मिळवू, असा विश्वास व्यक्त केला.
मंगळवेढा पोटनिवडणुकीत भेगडे पक्षाचे प्रभारी होते. या निवडणुकीसाठी ते तिकडे तळ ठोकून राहिले होते. त्यांच्या प्रचार नियोजनातून पक्षाचा तेथे विजय झाला.
म्हणून आता दुसरी तशीच जबाबदारी त्यांच्याकडे देण्यात आली आहे. गोव्याच्या टीम फडणवीसमध्ये पक्षाने त्यांचा समावेश केला आहे.
राज्याचे माजी माजी मुख्यमंत्री व केंद्रीय मंत्री नारायण राणे या भाजपच्या फायर ब्रॅण्ड नेत्याचा सुद्धा या टीममध्ये समावेश होण्याची शक्यता आहे.
महाराष्ट्रातील भाजपचे कोण कोण टीम फडणवीसमध्ये असणार हे येत्या दोन दिवसांत ठरणार आहे. दरम्यान, फडणवीस व प्रदेशाध्यक्ष चंद्रकांतदादा पाटील यांनी गोवा निवडणुकीबाबत राज्यातील प्रमुख पदाधिकाऱ्यांची ‘व्हर्च्युल मिटिंग’ काल घेतली. त्याला भेगडेही हजर होते.
पक्षाने दाखवलेला विश्वास सार्थ ठरवणार आहे. पक्षाने ही मोठी जबाबदारी दिली असून तसेच, पक्षाला मोठे यश गोव्यात मिळवून देणार असल्याची नियुक्तीनंतरची पहिली प्रतिक्रिया भेगडे यांनी दिली.
फडणवीस, गोव्याचे मुख्यमंत्री डॉ. प्रमोद सावंत, तेथील पक्षाचे प्रदेशाध्यक्ष सदानंदशेठ यांच्या नेतृत्वाखाली प्रचाराचे नियोजन करणार असल्याचे त्यांनी सांगितले.
निवडणूक जाहीर झाल्यानंतर महाराष्ट्रातील नेते आणि कार्यकर्ते प्रचारासाठी गोव्याला जाणार असल्याची माहिती त्यांनी दिली.
उमेदवार व पक्षाची बाजू गोव्यात प्रभावीपणे मांडणार असल्याचे त्यांनी सांगितले. या महिन्याच्या अखेरीसच निवडणुपूर्व तयारीसाठी गोव्याला जाऊन तेथील परिस्थितीचा आढावा घेणार आहे, असे ते म्हणाले.
भेगडेंसारख्या टीम फडणवीसमधील प्रत्येकाला गोव्यातील दोन-दोन, तीन-तीन मतदारसंघाची जबाबदारी सोपवली जाण्याची शक्यता आहे.
चाळीस सदस्यसंख्या असलेल्या गोवा विधानसभेत गतवेळी 2016 ला भाजपचे 13 आमदार निवडून आले होते. नंतर आणखी दहाजणांनी पक्षात प्रवेश केला.
तर, चार इतर व अपक्षांनी पाठिंबा दिला.त्यामुळे 27 आमदारांसह भाजप सध्या गोव्यात सत्तेत आहे. डॉ. सांवत त्यांचे तेथे मुख्यमंत्री आहेत. दरम्यान, महाराष्ट्रवादी गोमंतक पक्ष `मगोप`ने त्यांची साथ आता सोडलेली आहे. त्यामुळेच ती कसर भरून काढण्यासाठी महाराष्ट्रातील रसद भाजपने गोव्याला पुरविण्याचा निर्णय घेतला आहे.(स्रोत:सरकारनामा)
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
