मंगळवेढा टाइम्स न्यूज नेटवर्क ।
मंगळवेढा तालुक्यातील कचरेवाडीचे दोन सख्खे भाऊ… पाच वर्षांपासून एकमेकांच्या घरी जाणे दूरच पण एकमेकांचे तोंडही पाहणे नाही… दोन्ही घरात अबोल, ताणतणाव आणि भांडणे रोजचीच… या सर्वांचे निमित्त एका भावाने दुसऱ्या भावाचा अडवलेला रस्ता..!
गावच्या हद्दीमध्ये जमीन असणाऱ्या रामेश्वर मारुती पडवळे व सिद्धेश्वर मारुती पडवळे यांनी तहसील कार्यालय मंगळवेढा यांच्या वतीने राबविण्यात आलेल्या महसूल सप्ताह अंतर्गत ‘जनसंवाद’ या उपक्रमामध्ये रस्त्याचा विषय आपसी सामंजस्याने सोडविण्याबाबत तहसीलदार मदन जाधव यांनी आवाहन केले.
या आवाहनाला प्रतिसाद देत या दोन्ही भावांनी गेल्या पाच वर्षांपासून चाललेला रस्त्याचा वाद आपसी सामंजस्याने मिटविण्याचा निर्णय घेतल्यानंतर तहसीलदारांनी त्यांच्यातील वाद मिटवला आहे.
यातील रामेश्वर मारुती पडवळे यांचे कचरेवाडी हद्दीतील गट क्रमांक १६३/२/ब व सिद्धेश्वर मारुती पडवळे यांचे गट क्रमांक १६३/२/क येथे प्रत्येकी १ हेक्टर ३२ गुंठे क्षेत्र आहे.
तसेच पाच वर्षांपासून येथील रस्त्याबाबत दोन्ही भावांचा वाद सुरू होता. या वादाचे पर्यावसन कुटुंबात होऊन दोन्ही कुटुंबातील सदस्यांची मने दुभंगली होती. रस्त्यावरून होणाऱ्या वादाचा परिणाम वारंवार घरगुती भांडणात होत होता.
या रस्त्याबाबत तहसील कार्यालयात अर्धन्यायिक प्रकरण सुरू होते. दोन्ही पक्षांनी आपली बाजू मांडण्यासाठी वकिलांची नेमणूक केली होती. परंतु महसूल सप्ताहनिमित्त ‘जनसंवाद’मध्ये केलेल्या आवाहनाला प्रतिसाद देत दोन्ही भावांनी समझोत्याचा निर्णय घेतला आणि त्यांनी घेतलेल्या निर्णयाला दोन्ही वकिलांनीही आनंदाने होकार दिला.
त्यानंतर तहसील कार्यालयात दोन्ही भाऊ आणि दोन्ही बाजूचे वकील यांनी उपस्थित राहून आपसी लेखी तडजोडनामा तयार करून सादर केला. यावेळी तहसीलदार मदन जाधव यांच्या हस्ते दोन्ही भाऊ व दोन्ही वकील यांना वृक्षाचे रोप देऊन त्यांचा सत्कार करण्यात आला.
याप्रसंगी पाच वर्षांपासून चाललेल्या रस्त्याचा वाद आपसात मिटवल्याने दोन्ही भावांच्या डोळ्यात आनंदाश्रू तरळले.
दोन्ही भावांच्या चेहऱ्यावर केवळ रस्त्याचाच नाही तर कुटुंबातील सुद्धा वाद मिटून दोन्ही कुटुंबातील मने जुळल्याचा भाव स्पष्ट दिसत होता. या प्रकरणामध्ये वकील मनीष मर्दा आणि अनिल दुधाळ यांनी मोलाची भूमिका बजावली.
रस्त्याचे वाद आपसात मिटल्यास शेतकऱ्यांची वेळेची व आर्थिक बचत होणार
तालुक्यातील इतरही ठिकाणी सुरू असलेल्या रस्त्याचे वाद आपसात मिटल्यास शेतकऱ्यांची वेळेची व आर्थिक बचत होणार असून, मानसिक स्वास्थ्य लाभणार आहे. शिवाय गावातील वातावरणही आनंदी राहायला मदत होणार आहे. तक्रारदार व सामनेवाला शेतकऱ्यांनी महसूलच्या जनसंवाद उपक्रमात सहभागी होऊन आपली प्रकरणे निकाली काढून तडजोड केल्यास अनेक भांडणे संपतील. – मदन जाधव, तहसीलदार, मंगळवेढा.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
