टीम मंगळवेढा टाईम्स।
श्री.संत दामाजी सहकारी साखर कारखान्याने मुदतपूर्व व नियमबाह्य बेकायदेशीर नोटीसा देऊन १९ हजार सभासदांना अक्रियाशिल केले होते. मात्र सहकारी कायद्यात दुरुस्ती होत असल्याने दामाजी कारखान्याने कमी केलेले १९ हजार सभासद आता मतदानास पात्र होणार आहेत. यामुळे शेतकऱ्यांमधून आनंद व्यक्त करण्यात येत आहे.
पंढरपूर-मंगळवेढा विधानसभा पोटनिवडणूक प्रचारात दामाजी कारखान्याच्या १९ हजार सभासदांविषयीचा मुद्दा गाजला होता. मात्र चेअरमन आ.समाधान आवताडे यांनी कोणाचेही सभासदत्व रद्द होणार नसल्याचे अभिवचन शेतकरी सभासदांना दिले होते.
शासनाने सहकार कायद्यात दुरुस्ती करण्याचा निर्णय घेतला आहे. यामुळे दामाजी कारखान्याने सभासदत्व रद्द केलेल्या सभासदांना कारखाना निवडणुकीत मतदान करण्याचा अधिकार मिळणार आहे.
कोरोना परिस्थितीमुळे सहकारी संस्थांचे सदस्य मतदानाच्या मुलभूत हक्कांपासून वंचित राहू नयेत म्हणून अधिनियमात सुधारणा करण्याच्या प्रस्तावास मंत्रिमंडळाच्या बैठकीत मान्यता देण्यात आली.
त्यानुसार ३१ मार्च २०२२ पर्यंत घेण्यात येणाऱ्या कोणत्याही निवडणुकीत विद्यमान सदस्य हे मतदान करण्यास पात्र ठरतील असा निर्णय बैठकीत घेण्यात आला आहे.
शासनाच्या या निर्णयामुळे शेतकऱ्यांमधून समाधान होत आहे. आता दामाजी कारखाना निवडणुकीत २८ हजार सभासदांना मतदानाचा हक्क मिळणार आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
