टीम मंगळवेढा टाईम्स ।
कोरोनाच्या पार्श्वभूमीवर शासनाने दिलेल्या आदेशाचे पालन नवरात्र महोत्सव मंडळाच्या कार्यकर्त्यांनी करून नवरात्र महोत्सव शांततेत साजरा करावा असे आवाहन मंगळवेढा पोलिस स्टेशनचे पोलिस निरिक्षक जोतीराम गुंजवटे यांनी मंगळवेढा पोलिस स्टेशनमध्ये आयोजित करण्यात आलेल्या शांतता कमिटीच्या बैठकीत केले.
यावेळी जोतीराम गुंजवटे म्हणाले, सर्व मंडळांनी स्थानिक नगरपरिषद , ग्रामपंचायत यांचेकडून परवाना घेणे आवश्यक आहे. तसेच सहधर्मादाय आयुक्त यांचेकडे रितसर नोंदणी करून रितसर परवानगी घ्यावी. विद्युत पुरवठ्यासाठी संबंधित एम.एस.ई.बी. अथवा खाजगी व्यक्तीचे संमतीपत्र हवे.
देवीची प्रतिष्ठापना अथवा विसर्जन प्रसंगी मिरवणूक काढता येणार नाही. मर्यादित स्वरूपात मंडप उभा करावेत. दर्शनासाठी होणारी गर्दी टाळण्यासाठी ऑनलाईन दर्शनाची सुविधा उपलब्ध करून दयावी.
सी.सी.टि.व्ही. कॅमेरे बसवावेत. शक्तीदेवीच्या ठिकाणी २४ तास स्वयंसेवक असावेत. पावसामुळे कोणताही अनूचित प्रकार घडणार नाही याची दक्षता घ्यावी. कोठेही अनधिकृत पोस्टर , बॅनर अथवा आक्षेप असणारे फलक लावू नयेत.
वर्गणीची जबरदस्ती करू नये ध्वनीप्रदूषण नियमाचे उल्लंघन करू नये सांस्कृतिक कार्यक्रमाऐवजी जनजागृतीपर तसेच समाजोपयोगी कार्यक्रम अथवा शिबीर घ्यावे . महाराष्ट्र पोलिस अधिनियम ३७ ( १ ) , ३७ ( ३ ) लागू असल्याने सर्व नियमांचे काटेकोरपणे पालन करावे.
यावेळी माजी नगराध्यक्ष युवराज कलुबर्मे यांनी सर्व नियमांचे तंतोतंत पालन करून नवरात्र महोत्सव चांगल्या पध्दतीने व शांततेत साजरा करण्याची ग्वाही दिली. यावेळी न.पा. पक्षनेते अजित जगताप, शिवसेनेचे तालुका प्रमुख तुकाराम कुदळे, भाजपाचे तालुकाध्यक्ष गौरीशंकर बुरकूल, काँग्रेसचे जिल्हा सरचिटणीस फिरोज मुलाणी यांचेसह शशांक गवळी , अशोक भगत,
सुधीर बिले , केशव आवताडे , प्रदिप पडवळे, गणेश जोध, पंकज चव्हाण, रमेश ढगे व मंगळवेढा शहर व तालुक्यातील नवरात्र महोत्सव मंडळांचे पदाधिकारी, कार्यकर्ते उपस्थित होते.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
