मंगळवेढा टाईम्स न्युज नेटवर्क ।
मंगळवेढा तालुक्यातील पाण्याचा प्रश्न, शेतीचा प्रश्न बेरोजगारी व महिलांसाठी नवीन योजना याबाबत मी स्वतः लक्ष घालून हे सर्व प्रश्न मार्गी लावणार असल्याचा शद्ब सुप्रिया सुळे यांनी दिला आहे.
महाविकास आघाडी राष्ट्रवादी काँग्रेस शरदचंद्र पवार पक्षाचे अधिकृत उमेदवार अनिल सावंत यांच्या प्रचार्थ मंगळवेढ्यातील आयोजित सभेत त्या बोलत होत्या.
माजी मंत्री लक्ष्मणराव ढोबळे, शिवव्याख्याते श्रीमंत कोकाटे, राष्ट्रवादी कॉंग्रेसचे नेते राहुल शहा, माजी जिल्हा परिषद सदस्य वसंतनाना देशमुख, शिवसेना शहरप्रमुख दत्तात्रय भोसले, काँग्रेसचे फिरोज मुलाणी, माजी उपनगराध्यक्ष मुजफर काझी, माजी नगरसेवक चंद्रशेखर कोंडूभैरी, कार्याध्यक्ष संतोष रंधवे, तालुकाध्यक्ष प्रथमेश पाटील, जेष्ठ नेते दादासाहेब गरंडे, राजाभाऊ चेळेकर, महिला नेत्या संगीता कट्टे, यांच्यासह महिला पदाधिकारी मोठ्या संख्येने उपस्थित होते.
सुप्रिया सुळे पुढे बोलताना म्हणाल्या की, अनिल सावंत हे आधाराची सावली म्हणून तुमच्या सोबत कायम उभे राहणार आहेत. मंगळवेढा पंढरपूर विधानसभेचे निवडणूक जनतेने हातात घेतली आहे. मला पवार साहेबांनी अनिल सावंत यांच्यासाठी पाठवले आहे.
सोलापूर जिल्ह्यात सध्या एकच नारा घुमतोय राम कृष्ण हरी वाजवा तुतारी. वातावरण बदलत चाललेय आहे. मंगळवेढा व सोलापूरकरांनी पवार साहेबांना भरभरून प्रेम दिले आहे. सगळ्यात युवा मुख्यमंत्री म्हणून शरद पवार हे झाले होते. ते सोलापूरला आले तेव्हा लोकांनी रस्त्यावरून गुलाबाच्या पाकळ्या टाकून मिरवणूक काढली होती.
मी विठ्ठलाची भक्त आहे. ही संतांची भूमी आहे. अनिल सावंत यांचा पारदर्शक कारभार आहे. त्यामुळे अशा उमदा उमेदवार विधानसभेत गेला पाहिजे.
हा देश कुणाच्या मरजीने चालत नसून डॉ.बाबासाहेब आंबेडकर यांच्या दिलेला घटनेवर चालत आहे. सलग पाच वर्षे सरकार आल्यावर महागाई वाढू देणार नसून महिलांसाठी अनेक योजना राबवणार आहे. लोकसभेला जसा दणका दिला त्याप्रमाणे विधानसभेला दणका देऊन अनिल सावंत यांना निवडुन द्या.
भाजप सरकारच्या काळात पाण्याची बाटली वीस रुपयाला व दुधाला 24 रुपये भाव हा कसला अन्याय आहे. सरकार जनतेची लूट करत आहे. आम्ही शेतकऱ्यांच्या प्रत्येक पिकाला हमीभाव देणार. सर्वसामान्य जनतेत मिसळून काम करणारा असा आमदार निवडून द्यायला पाहिजे.
त्याचबरोबर सरसकट शेतकऱ्यांची कर्जमाफी करणार, आमचे सरकार आल्यानंतर मंत्रालय 24 तास जनतेसाठी खुले राहणार. आम्ही सत्तेसाठी मतं मागत नसून शेतकरी, बेरोजगार, महिला यांच्या भविष्यासाठी मत मागत आहे.
बेरोजगारी, महागाई कमी करून महिलांना महिन्याला 3 हजार रुपये देणार असल्याची घोषणा त्यांनी केली. विठ्ठलाच्या आशीर्वाद अनिल सावंत यांच्या सोबत असून पाच नंबरला तुतारी चिन्ह असून त्या समोरील बटन दाबा असे आवाहन त्यांनी केले.
अनिल सावंत बोलताना म्हणाले की, गेल्या पन्नास वर्षांपासून शरद पवार साहेबांच्या विचारांचा मतदारसंघ आहे. मंगळवेढा-पंढरपूर मधील जनतेची ज्यांनी दिशाभूल केली आशा लोकांना जागा दाखवून देण्याची वेळ आली आहे.
आमदार आवताडे यांनी 3 हजार कोटींचा निधी आणला असा खोटा गवगवा करत आहेत. ज्यांनी त्यांना निवडून दिले त्या परिचारक साहेबांना देखील त्यांनी फसवले. भगीरथ भालके यांनी जनतेची दिशाभूल करून खोटा प्रचार सुरू केला. आशा लोकांना धडा शिकवण्याची वेळ आली आहे. असे लोक मतदारसंघात फिरत आहेत खोटी वेगवेगळे आश्वासन देत आहेत अशा लोकांना जनता त्यांची जागा दाखवून देईल.
मला फक्त विकास करायचा आहे या मतदारसंघाचा शेतकऱ्यांच्या उसाला चांगला दर देण्याची भूमिका पार पाडली असून वेळेवर बिल दिले आहे. गेली 50 वर्ष पाण्यावरून राजकारण करून खोटी आश्वासने देऊन निवडून आले आहेत.
शेतकऱ्यांना हातभार देण्यासाठी नवीन उद्योग सुरू करत आहे. येणाऱ्या काळात तरुणांच्या शिक्षणासाठी मोठे शैक्षणिक संकुल सुरू करणार आहे. बचत गटातील महिलांना घरगुती काम मिळवून देणार आहे.
संत बसवेश्वर, छत्रपती शिवाजी महाराज यांचा स्मारकाचा विषय आजपर्यंत नुसता कागदोपत्री रेंगाळला आहे. एक ही ठोस काम मार्गी लागले नसल्याचा आरोप आणि अनिल सावंत यांनी केला.
माजी मंत्री लक्ष्मणराव ढोबळे बोलताना म्हणाले की, काल कर्नाटकचे मुख्यमंत्री यांनी मंगळवेढा तालुक्यातील जनतेला खोटी आश्वासने देऊन गेले.
कर्नाटकचे मुख्यमंत्री मराठी माणसाला शिव्या देत असतात. बेळगावचा मास्टर प्लॅन त्यांनी अडवला आहे. मराठी माणसाची मोठी अडवणूक करत असल्याचा आरोप ढोबळे यांनी केला.
शरद पवार यांनी सर्व समाजाच्या नेत्यांना सोबत एकत्र घेऊन राजकारण केले आहे. आमदार समाधान आवताडे यांनी तीन वर्षाच्या काळात कोणतेच ठोस काम केले नाही.
जनतेच्या प्रश्नसंदर्भात आमदार आवताडे यांनी किती वेळा आवाज उठवला हे त्यांनी सांगावे? त्यांनी दोन नंबरच्या धंद्याबद्दल तक्रार केली पोलीसाविरुद्ध आवाज उठवला. यानंतर कुठला समजोता झाला हे त्यांनी जाहीर करावे. सध्या तर सर्व अवैध धंदे सुरु आहेत. या संदर्भातील त्यांनी खुलासा करावा.
मी जिल्ह्याचा पालकमंत्री असताना छावणी चालकांचे पैसे घरपोच झाले होते. यांच्या काळात छावणी चालकांची मोठी पिळवणूक सुरु आहे. आद्यप एकही बिल अदा केलेला आहे.
अनिल सावंत यांनी पंधरा वर्षांपूर्वी लवंगीच्या माल रानावरती साखर कारखाना सुरू करून बेरोजगार तरुणांच्या हाताला काम मिळवून दिले असून येणाऱ्या काळात अनेक उद्योग सुरु करणार असल्याचे त्यांनी सांगितले.
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स”च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
