टीम मंगळवेढा टाईम्स ।
सोलापूर जिल्हा सहकारी दूध उत्पादक संघाच्या अध्यक्ष, उपाध्यक्षपदाच्या निवडीसाठी उद्या मंगळवारी दि.८ मार्च रोजी संचालक मंडळाची बैठक बोलावली आहे.
संचालक मंडळाच्या संघ निवडणुकीत निवडणूक प्रस्थापित नेत्यांनी सत्ता मिळवली आहे. अध्यक्षपदासाठी माढ्याचे आमदार बबनराव शिंदे यांचे पुत्र रणजितसिंह शिंदे , बबनराव आवताडे,
तर उपाध्यक्षपदासाठी ज्येष्ठ संचालक मारुती लवटे, औदुंबर वाडदेकर, दीपक माळी यांची नावे पुढे येत आहेत.
प्रशासनाने जिल्हा दूध संघाच्या नूतन संचालकांची उद्या दि.८ मार्च रोजी शहरातील संघाच्या कार्यालयात बैठक बोलावली आहे. यात संघाचे नूतन अध्यक्ष व उपाध्यक्ष निवडले जाणार आहेत.
गेल्या शनिवारी झालेल्या निवडणुकीत सत्ताधारी पॅनेलने निर्विवाद वर्चस्व मिळवले आहे. निवडणुकीच्या आधीपासूनच अध्यक्षपदासाठी बबनराव आवताडे यांचे नाव चर्चेत होते.
आवताडे हे तिसऱ्यांदा दूध संघावर संचालक म्हणून निवडून आले आहेत. तर सत्ताधारी पॅनेलच्या विजयासाठी मोठी ताकद लावली होती.
नेतेमंडळींच्या बैठकीत अध्यक्षपदी अडीच-अडीच वर्षे संधी देण्याचे ठरल्याची माहिती समोर येत आहे. सुरुवातीला अध्यक्षपदी शिंदे किंवा आवताडे यांची वर्णी लागण्याची शक्यता अधिक आहे.
तसे झाल्यास उपाध्यक्ष पदासाठी मंगळवेढा तालुक्यातून औदुंबर वाडदेकर, मोहोळचे दीपक माळी यांची नावे पुढे येत आहेत. तर पाचव्यांदा जिल्हा दूध संघाचे संचालक झालेले शेतकरी कामगार पक्षाचे मारुती लवटे हेही या पदाचे दावेदार असण्याची शक्यता आहे.
उपाध्यक्षपद वाडदेकरांना मिळण्याची चिन्हे
अध्यक्ष, उपाध्यक्ष पदासाठी इच्छुक सर्व संचालकांनी पक्षश्रेष्ठी निर्णय घेणार असल्याचे सांगितले आहे. सध्या जिल्ह्यातील राजकारणात करमाळ्याचे आमदार संजय शिंदे यांचा बोलबाला आहे. त्यामुळे रणजितसिंह शिंदे अध्यक्षपदी किंवा बबनराव आवताडे यापैकी निवडले जाणार असल्याची चर्चा आहे.
तसेच त्यांचे मित्र माजी आमदार प्रशांत परिचारक यांच्या गटाचे औदुंबर वाडदेकर यांची उपाध्यक्षपदी निवड होण्याची जास्त शक्यता आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
