टीम मंगळवेढा टाईम्स ।
पंधरा लाखांचे तिस लाख असे डबल पैसे करून देतो म्हणून फसवणूक केल्याप्रकरणी संकल्प नागरी सहकारी पतसंस्थेचे अध्यक्ष प्रथमेश कट्टे याच्याविरुद्ध शुक्रवारी एका व्यक्तीने गुन्हा दाखल केला होता.
यामुळे पतसंस्थेत ठेवलेल्या ठेवींची रक्कम मिळत नाही, असा तक्रारी अर्ज घेऊन प्रथमेश कट्टे याच्याविरोधात आणखी पाचजण पुढे आले आहेत.
सुनील भिसे (वय ३५, रा.अंबाबाई पटांगण झोपडपट्टी,अंबिकानगर, सध्या अक्षत बंगलोज सोसायटी, कॉलेज चौक, पंढरपूर) यांना शेतजमीन घ्यायची होती.
त्यांना शेतजमीन घेण्यासाठी १५ लाखांचे ३० लाख रुपये करून देतो असे सांगून प्रथमेश कट्टे व शुभम कोरके यांनी फसवणूक केल्याची तक्रार पोलिसांना प्राप्त झाली होती. त्याची चौकशी करून पोलिसांनी दोघांविरुद्ध गुन्हा दाखल केला होता.
त्याचबरोबर प्रथमेश कट्टे अध्यक्ष असलेल्या संकल्प नागरी सहकारी पतसंस्थेमध्येही लोकांनी ठेवी ठेवल्या आहेत. परंतु, त्यांची रक्कम परत मिळत नसल्याबाबत पाचजणांनी शहर पोलीस ठाण्यात अर्ज दाखल केला आहे. याबाबत सहायक पोलीस निरीक्षक कपिल सोनकांबळे तपास करीत आहेत.(स्रोत:लोकमत)
ठेवी मिळविण्यासाठी प्राप्त अर्ज
अर्ज केलेल्यांमध्ये अंबादास कृष्णा फराटे (रा.परदेशी नगर,पंढरपूर) यांनी पतसंस्थेत १ लाख ४० हजारांची मुदत ठेव ठेवली होती.
लक्ष्मण शहाजी जगताप (रा.टाकळीरोड, पंढरपूर) यांनी ८४ हजार रुपयांची ठेव ठेवली होती.
विजयसिंह ठाकूर (रा. पंढरपूर) यांनी १ लाख रुपयांची ठेव पतसंस्थेत ठेवली होती.
रमाकांत दुनाखे (रा.लक्ष्मीपथ रोड, पंढरपूर ) यांनी १ लाख ३० हजार रुपयांची ठेव पतसंस्थेत ठेवली होती.
सुखदेव गोडसे (रा.सावरकर नगर,पंढरपूर ) यांनी अडीच लाख रुपयांची ठेव ठेवली होती.
फसवणूक झाली असल्यास त्यांनी पोलिसांशी संपर्क साधावा
या अर्जाबाबत तपास करून आणखी गुन्हा दाखल करण्यात येणार आहे. तसेच कट्टे याच्याकडून आणखी लोकांची फसवणूक झाली असल्यास त्यांनी पोलिसांशी संपर्क साधावा, असे आवाहन उपविभागीय पोलीस अधिकारी विक्रम कदम यांनी केले आहे.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
