टीम मंगळवेढा टाईम्स ।
शालेय पोषण आहारात आता आजपासून विद्यार्थ्यांना अंडी, पुलाव किंवा अंडा बिर्याणी मिळणार आहे. अंडी न खाणाऱ्यांसाठी केळी, चिकू, पेरी यापैकी एक फळ दिले जाणार आहे. आठवड्यातील बुधवार किंवा शुक्रवार या पैकी कोणत्याही एका दिवशी प्रतिविद्यार्थी पाच रुपयांप्रमाणे हा खर्च केला जाणार आहे.
राज्य सरकारच्या निर्णयानुसार जिल्हा परिषदेने इयत्ता पहिली ते आठवीपर्यंतच्या शाळांना (जिल्हा परिषदेसह खासगी अनुदानित शाळा) पत्रव्यवहार केला आहे.
स्थानिक बाजारातून संबंधित शाळेच्या मुख्याध्यापकांनी अंडी व फळे विकत घ्यायची आहेत. त्यासाठी पहिल्या सहा आठवड्यांच्या खर्चापोटी प्रत्येक विद्यार्थ्यांला ३० रुपये, याप्रमाणे अग्रिम दिला जाणार आहे.
आठवड्यातील बुधवारी किंवा शुक्रवारी विद्यार्थ्यांना नवीन बदलानुसार आहार मिळेल, यादृष्टीने पोषण आहाराच्या योजनेसाठी पात्र चार हजार ९५ शाळांच्या मुख्याध्यापकांनी विद्यार्थी संख्येच्या प्रमाणात अंडी व फळांची खरेदी करायची आहे.
अंडी खाणाऱ्या व न खाणाऱ्या विद्यार्थ्यांची यादी तयार करून त्यांना अंडी व फळे द्यायची आहेत. दिवाळी सुटीनंतर आजपासून शाळा सुरु होणार असून विद्यार्थ्यांना पहिल्याच दिवशी किंवा या आठवड्यातील शुक्रवारी नवीन बदलानुसार आहार मिळेल.
शालेय पोषण आहाराचे लेखाधिकारी डॉ. वैभव राऊत यांच्या मार्गदर्शनाखाली त्यासंबंधीची कार्यवाही सुरु आहे.
कुकुटपालन, फळबाग लागवडीला प्रोत्साहन
शालेय शिक्षण विभागाच्या निर्णयानुसार आता शालेय पोषण आहारात अंडी व केळीचा समावेश करण्यात आला आहे. त्यातून विद्यार्थ्यांची शाळांमधील गळती कमी होईल, असा विश्वास आहे.
दुसरीकडे गावात अंडी व फळे उपलब्ध असल्यास मुख्याध्यापक त्याची खरेदी करू शकणार आहेत. त्यातून स्थानिक पातळीवर कुक्कुटपालन व फळबाग लागवडीला प्रोत्साहन मिळणार आहे. प्रत्येक विद्यार्थ्यांसाठी पाच रुपयांचा खर्च होणार असल्याने तेवढी रक्कम संबंधित शेतकऱ्याला जागेवरच मिळेल.
सोलापूर जिल्ह्यात ४.७० लाख लाभार्थी
जिल्ह्यातील जिल्हा परिषदेसह इतर खासगी अनुदानित चार हजार ९५ शाळांमधील इयत्ता पहिली ते आठवीपर्यंतच्या चार लाख ७० हजार विद्यार्थ्यांना शालेय पोषण आहाराचा लाभ दिला जातो.
नवीन बदलानुसार आठवड्यातून एकदा अंडी व केळी दिली जाणार असल्याने त्यासाठी दर आठवड्याला जवळपास २३ लाख ५० हजार रुपयांचा खर्च अपेक्षित आहे. शासनाकडून तो निधी जिल्हा परिषदेच्या माध्यमातून संबंधित शाळांना मिळणार आहे.(स्रोत:सकाळ)
अशाच महत्वपूर्ण बातम्या आणि माहीती मनोरंजन मिळवा तुमच्या व्हॉट्सअँप ग्रूपमध्ये, त्यासाठी पुढील नंबर तुमच्या ग्रुपमध्ये समाविष्ट करा – 9970766262
“मंगळवेढा टाईम्स“च्या बातम्या मिळविण्यासाठी 9970766262 हा नंबर तुमच्या व्हॉट्सऍपवर ग्रुपवर ऍड करून फक्त एक मेसेज करा.
मराठी बातम्या, ब्रेकिंग न्यूज मराठीत सर्वात आधी Mangalwedha Times वर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट मंगळवेढा टाईम्स.
बातम्या सर्वप्रथम जाणून घेण्याकरिता व्हाट्सअप ग्रुप जॉईन करा.
बातम्या सर्वप्रथम जाणून घेण्याकरिता लाईक करा आमचे फेसबुक पेज
